Լրահոս

Անդրանիկ Կարապետյանը պոկում վարժությունում նվաճեց փոքր ոսկե մեդալ, հրում վարժությունում ցախողեց ելույթը՝ ստանալով վնասվածք




Ուզբեկստանի մայրաքաղաք Տաշքենդում ընթացքի մեջ է ծանրամարտի աշխարհի առաջնությունը։

Այս պահին ընթացող 89 կգ քաշայինների պայքարում փոքր ոսկե մեդալի արժանացավ Հայաստանի ներկայացուցիչ Անդրանիկ Կարապետյանը։

Անդրանիկը հաջողությամբ կատարեց պոկում վարժության բոլոր երեք մոտեցումները՝ վերջին մոտեցմամբ գլխավերևում պահելով 175 կիլոգրամանոց ծանրաձողը։

Երկրորդ տեղում ընթացող վրացի Իրակլի Դավիթաձեին Կարապետյանը գերազանցում է չորս կիլոգրամով։

Հրում վարժության առաջին մոտեցմամբ Անդրանիկ Կարապետյանը չկարողացավ գլխավերեւոմ ֆիքսել 196 կգ-ը: Երկրորդ մոտեցմամբ 196-ը կրկին ձախողեց եւ դժվարությամբ լքեց մրցահարթակը: Բժիշկների միջամտությամբ, Փաշիկ Ալավերդյանի գլխավորած թիմը որոշեց վնասվածքով գնալ նաեւ երրորդ փորձի, բայց Անդրանիկ Կարապետյանը չկարողացավ 196 կգ հրել: Նրան օգնեցին մրցահարթակից իջնել: Այս վարժությունում Կարապետյանը զրո ստացավ:

Ինչպես հայտնի դարձավ ավելի ուշ, Անդրանիկը ոտքի քառագլուխ մկանի ջիլն է կտրել։

Երկամարտի 371 կգ արդյունքով աշխարհի չեմպիոնի տիտղոսը նվաճեց կորեացի Յու Դոնջուն։ Նույն քաշը բարձրացրեց նաև ուզբեկ Սարվարբեկ Զաֆարժոնովը, սակայն կորեացին առաջինն էր մոտեցել պատվիրված քաշին, այդ պատճառով արժանացավ ոսկե մեդալին։



Զաֆարժոնովն արժանացավ արծաթե մեդալին, իսկ երկամարտի 370 կգ արդյունքով բրոնզե մեդալակիր դարձավ վրացի Ռևազ Դավիթաձեն։