Հանրահայտ երգիչ Գարուի մենահամերգը Հայաստանում
Հանրահայտ կանադացի երգիչ, «Նոտր Դամ դը Պարի» մյուզիքլում Քվազիմոդոյի դերը մարմնավորած Գարուն ապրիլի 21 մենահամերգով հանդես եկավ Կարեն Դեմիրճյանի անվան մարզահամերգային համալիրում:
Երգիչը հիացրել է հանդիսատեսին՝ կատարելով իր ամենահայտնի և սիրված երգերը։ Բոլոր կատարումներն ուղեկցվում էին բուռն ծափողջյուններով և արժանանում ջերմ արձագանքների:
Բացի իր երգերից, Գարուն կատարեց նաև Շառլ Ազնավուրի, Միշել Լեգրանի, Ժո Դասենի, Բոբ Մառլիի և այլ անվանի արտիստների երգերը: Նա խոստովանել է, որ իր համար հատկապես անկրկնելի է ու յուրահատուկ «Շերբուրգյան հովանոցներ» ֆիլմի երաժշտությունը: Ջերմ հանդիսատեսն առանձնահատուկ ոգևորությամբ ունկնդրեց Ազնավուրի La bohème, Emmenez-moi հանրահայտ ստեղծագործությունները:
Այս տոնն իրականություն դարձավ «Երևանյան հեռանկարներ» միաջազգային երաժշտական փառատոնի շրջանակներում և այս տարի այն ունի առանձնահատուկ նշանակություն, քանի որ Հայաստանը տոնում է Ֆրանկոֆոնիայի միջազգային կազմակերպությանն իր լիիրավ անդամակցության տասնամյա հոբելյանը։