Լրահոս

Հասկանանք՝ պե՞տք է մեր պետությանը բասկետբոլի ազգային հավաքականը, թե՞ ոչ. Արթուր Նազարյան




2016 թվականին բասկետբոլի Հայաստանի հավաքականը առաջին անգամ նվաճեց Եվրոպայի փոքր երկրների առաջնության չեմպիոնի կոչումը՝ կրելով մեկ պարտություն։ Վեց տարի անց մեր հավաքականը հաղթեց բոլոր հանդիպումներում և արժանիորեն նվաճեց լավագույնի տիտղոսը արդեն երկրորդ անգամ։

 Դեռևս պարզ չէ՝ արդյոք Հայաստանի հավաքականը կմասնակցի Եվրոպայի կամ աշխարհի առաջնությունների ընտրական հանդիպումներին։ Այդ մասին ասուլիսի ժամանակ հայտարարեցին Հայաստանի բասկետբոլի ֆեդերացիայի գլխավոր քարտուղար Արթուր Նազարյանն ու հավաքականի բասկետբոլիստ Ալբերտ Թադևոսյանը՝ ամփոփելով Եվրոպայի փոքր երկրների առաջնությունը։

Հիշեցնենք, որ առաջնությունում Հայաստանի հավաքականը հաղթելով բոլոր հանդիպումներում՝ նվաճեց չեմպիոնի կոչումը։

«Եվրոպայի առաջնությունից առաջ Երևանում անցկացված SADA Cup մրցաշարը ցույց տվեց, որ մեր հավաքականը պատրաստ է գալիք մրցումներին։ Մալթայում մեզ միացավ Քրիս Ջոնսը, ու պարզ էր, որ մենք մարտունակ ու լիարժեք թիմ ունենք հաղթողի կոչմանը հավակնելու համար» - ասեց ՀԲՖ-ի գլխավոր քարտուղարը։
Դեռևս պարզ չէ, թե արդյոք Հայաստանի հավաքականը կմասնակցի Եվրոպայի կամ աշխարհի առաջնությունների ընտրական հանդիպումներին։

«Առայժմ չենք կարող հստակ ասել, որ կմասնակցենք Եվրոպայի կամ աշխարհի առաջնություններին ընտրական խաղերին։ Պետք է հասկանանք՝ արդյոք մեր պետությանը պետք է բասկետբոլի Հայաստանի հավաքականը նման մրցումներում։ Առանց պետական աջակցության մենք ֆինանսական հնարավորություններ չունենք հանդես գալու։ Վրաստանի հավաքականը հաջող հանդես է գալիս նման մրցումներում իր պետության աջակցության շնորհիվ։ Այս պահի դրությամբ Եվրոպայի փոքր երկրների առաջնությունը մեր մաքսիմում հնարավորությունն է հանդես գալու առումով։ Ժամանակի ընթացքում կհասկանանք՝ կարո՞ղ ենք հանդես գալ Եվրոպայի կամ աշխարհի առաջնություններում»- նշեց Արթուր Նազարյանը։
Ալբերտ Թադևոսյանն իր հերթին նշեց, որ ընդամենը երկու շաբաթ նախապատրաստվելու ժամանակ ունեին։

«Մարզիչ Ռեքս Քալամյանին ու նրա օգնականներին հաջողվեց այդ կարճ ժամանակահատվածում անել անհնարինը, և թիմը շատ արագ կերպով կարողացավ հարմարվել մարզիչների տակտիկական մտահաղացումներին։ Երբեմն մարզիչները ավելի էին հոգնում մարզումների ժամանակ, քան բասկետբոլիստները։ Բայց կարևորն այն էր, որ թիմն ու մարզիչներն իրար շատ լավ հասկանում էին, ու դրա շնորհիվ էլ հասանք հաջողության»,-ասաց նա։

Եվրոպայի փոքր երկրների առաջնության եզրափակիչը հաջող չսկսվեց մեր ընտրանու համար։ Խաղի մեկնարկում մեր թիմը պարտվում էր 0։13 հաշվով, բայց հետո մեր հավաքականը աստիճանաբար գտավ իր խաղն ու կարողացավ արժանի հաղթանակ տոնել․ «Մալթայում տեղի հավաքականի հետ խաղում, իհարկե, երկրպագուների աջակցության պայմաններում խաղահրապարակի տերերը ոգևորված սկսեցին եզրափակիչը։ Բայց մենք մեկնարկային այդ հուզմունքից հետո թիմային խաղով կարողացանք հասնել մեր նպատակին ու հաղթեցինք» - հավելեց Ալբերտ Թադևոսյանը։

Արթուր Նազարյանը նշեց նաև այն, որ Հայաստանը բասկետբոլում բավականին մեծ ներուժ ունի։ Բայց գլխավոր քարտուղարի կարծիքով՝ եթե կոմերցիոն սկզբունք չեղավ, մեր բասկետբոլը չի կարող զարգանալ։

Մեզ կարող եք հետևել նաև Telegram-ում