Լրահոս

Սերժ Թանկյանի ու Արցախի պետական ջազ նվագախմբի օնլայն կատարումը՝ Արցախի շրջափակման մասին պատմող տեսանյութում




Սերժ Թանկյանը ինստագրամյան իր էջում կիսվել է Traveling Doctor's of Armenia-ի՝ Արցախի շրջափակման մասին պատրաստած տեսանյութով, որում ներգրավված է նաեւ ամերիկահայ երաժիշտը։ Թանկյանը ներկայացնում է Distant Thing երգի կատարումը՝ Արցախի պետական ջազ նվագախմբի հետ օնլայն համագործակցությամբ (նվագախումբը՝ Արցախից, Թանկյանը՝ Լոս Անջելեսից)։

«Հայերը պետք է միավորվեն՝ Արցախում գտնվող մեր քույրերին եւ եղբայրներին օգնելու համար»,-ասում է երաժիշտը,-«Այն, ինչ կատարվում է Արցախում, մարդկային աղետ է, այն, ինչ կատարվում է, էթնիկ ոչնչացում է՝ ցեղասպանություն։ Սա ոչ միայն հայերին է վերաբերում, այլեւ ամբողջ աշխարհին, քանի որ սա ցեղասպանություն է»։


Տեսանյութում Ադրբեջանի կողմից Արցախի անօրինական ու անմարդկային շրջափակմանն են անդրադարձել նաեւ Ռոզա Լինը եւ քաղաքական վերլուծաբան Էրիկ Հակոպյանը: Կատարմամբ հանդես են գալիս նաեւ արցախցի երգիչներ Արթուր Խաչենցն ու Լյոկան։

Ռոզա Լինն անդրադառնալով Արցախի պետական ջազ նվագախմբի կողմից իր Hallelujah երգի կատարմանը՝ նշում է,-«Ձեզ անսահման սեր եմ ուղարկում եւ հուսով եմ՝ մենք շատ շուտով կապրենք խաղաղության մեջ»։

Instagram-ում հրապարակված հոլովակին կից Սերժ Թանկյանը գրել է,-«Աշխարհի տարբեր արտիստների երաժշտական կատարումներով մենք կրկին ուշադրություն ենք սեւեռում Արցախի անօրինական շրջափակման վրա եւ կոչ անում միջազգային հանրությանը անհապաղ օգնել դադարեցնելու այն»։