Վալերի Ծառուկյան․ «Շատ ուրախ կլինեմ, եթե հրավիրվեմ Հայաստանի հավաքական» - Home - EXCLUSIVElife.am: Armenian Celebrities, Events, Fashion, Presentations & Photoshoot

Լրահոս

Վալերի Ծառուկյան․ «Շատ ուրախ կլինեմ, եթե հրավիրվեմ Հայաստանի հավաքական»




Ձմեռային տրանսֆերային պատուհանի ընթացքում Հայաստանի հավաքականի կիսապաշտպան Էդգար Սևիկյանը հեռացավ «Նիժնի Նովգորոդից» և պայմանագիր կնքեց հունգարական «Ֆերենցվարոշի» հետ: Սևիկյանի տրանսֆերը վաճառելուց անմիջապես հետո ռուսական ակումբը ձեռք բերեց մեկ այլ հայ ֆուտբոլիստի՝ կիսապաշտպան Վալերի Ծառուկյանին: 22-ամյա ֆուտբոլիստի տրանսֆերի համար «Նիժնի Նովգորոդը», ըստ ոչ պաշտոնական տվյալների, Վլադիկավկազի «Ալանիային» վճարեց 100 հազար եվրո: Մինչև Ռուսաստանի Պրեմիեր լիգա տեղափոխվելը Ծառուկյանը խաղացել էր Վորոնեժի «Ֆակելում», Աստրախանի «Վոլգարում» և Վլադիկավկազի «Ալանիայում»՝ ընդհանուր առմամբ Ռուսաստանի ֆուտբոլի Ազգային լիգայում անցկացնելով 62 հանդիպում և դառնալով 5 գոլի ու 10 գոլային փոխանցման հեղինակ:

VNews-ը զրուցել է հարձակողական ոճի կիսապաշտպանի հետ, որը դեռևս չի համարվում «Նիժնի Նովգորոդի» մեկնարկային կազմի ֆուտբոլիստ, սակայն մրցաշրջանի գարնանային հատվածում մասնակցել է Ռուսաստանի Պրեմիեր լիգայի 4 հանդիպման՝ բոլոր դեպքերում դուրս գալով փոխարինման:

Վալերի, որտեղի՞ց են արմատներդ: Ե՞րբ և որտե՞ղ ես սկսել ֆուտբոլով զբաղվել:

Ծնողներս Թբիլիսիից են, բայց ես ծնվել եմ Ստավրոպոլում և հենց այնտեղ էլ սկսել եմ առաջին քայլերս:

Ունե՞ս հայկական անձնագիր: Երբևէ հրավեր ստացե՞լ ես՝ Հայաստանի պատանեկան և երիտասարդական հավաքականներում խաղալու:

Ոչ, հայկական անձնագիր չունեմ և նախկինում նման հրավեր չեմ ստացել:



Կարիերայիդ ընթացքում հիմնականում խաղացել ես Ռուսաստանի Առաջին լիգայում՝ ՖԱԼ-ում: Այս տարիների ընթացքում չե՞ն եղել կարիերան այլ երկրում շարունակելու տարբերակներ:

Պաշտոնական առաջարկներ չեն եղել:

Հայաստանում ունե՞ս բարեկամներ և երբևէ եղե՞լ ես պատմական հայրենիքում:

Հայրիկի կողմից շատ ազգականներ ունեմ: Մեկ անգամ էլ եղել եմ Հայաստանում:

Հետևո՞ւմ ես հայկական ֆուտբոլում տեղի ունեցող իրադարձություններին, Հայաստանի հավաքականի հանդիպումներին:


Հնարավորության դեպքում դիտում եմ հավաքականի խաղերը:

Ձմռանը տեղափոխվեցիր «Նիժնի Նովգորոդ»: Այդ ժամանակ բավականին շատ էին խոսակցություններն այն մասին, որ ռուսական ակումբը քո տրանսֆերը ձեռք է բերել, որպեսզի փոխարինես թիմից հեռացած Էդգար Սևիկյանին: Ի վերջո տեղափոխության գլխավոր դրդապատճառը դա՞ էր, թե՞ թիմում այլ դերակատարում ունես:

Այո, շատ էին նմանատիպ խոսակցությունները, բայց ես կարծում եմ, որ դա այդքան էլ խելամիտ տեսակետ չէ: Ես տեղափոխվել եմ Ռուսաստանի Պրեմիր լիգա, քանի որ նախկինում ինձ լավ եմ դրսևորել Ֆուտբոլի ազգային լիգայում:



Դեռևս շատ խաղաժամանակ չես ստանում նոր ակումբում: Մրցակցությունը մե՞ծ է քո դիրքում:

Մրցակցություն միշտ լինելու է, բայց ես վստահ եմ, որ իմ շանս ստանալու ժամանակը ևս գալու է:

Հայ ֆուտբոլիստների շրջանում ունե՞ս ընկերներ:

Էդուարդ Սպերցյանին գիտեմ դեռևս «Կրասնոդարի» ակադեմիայում խաղալու տարիներից, քանի որ ես էլ մեկ տարի անցկացրել եմ այնտեղ: Բայց չեմ կարող ասել, որ մենք այնքան մոտ ենք, որ ամեն օր խոսում ենք հեռախոսով, կամ ճաշում ենք ռեստորանում: Հայ ֆուտբոլիստներից իմ մոտ ընկերն է Սերգեյ Մոսիյանը (21-ամյա հարձակվող Սերգեյ Մոսիյանը և կիսապաշտպան Արթուր Առուստամյանը խաղում են Ֆուտբոլի ազգային լիգան ներկայացնող Լիպեցկի «Մետալուրգում»):

Հայաստանի հավաքականից հրավեր ստանալուց հետո ի՞նչ պատասխան կտաս:

Շատ ուրախ կլինեմ և կընդունեմ հրավերը: