«Ինձ չեմ համարում գեղեցկուհի, բայց ես ինձ այսպիսին սիրում եմ». DJ Vakcina - Home - EXCLUSIVElife.am: Armenian Celebrities, Events, Fashion, Presentations & Photoshoot

Լրահոս

«Ինձ չեմ համարում գեղեցկուհի, բայց ես ինձ այսպիսին սիրում եմ». DJ Vakcina




Tert.am Life-ի բլից հարցերին այս անգամ պատասխանել է Արուսիկ Մկրտչյանը՝ DJ Vakcina-ն:

-Ինչպե՞ս են սկսվում Ձեր աշխատանքային և ոչ աշխատանքային առավոտները:


- Ինձ մոտ հիմնականում գերակշռում են աշխատանքային օրերը և դժվարանում եմ հիշել, երբ եմ վերջին անգամ ունեցել ոչ աշխատանքային օր: Միգուցե այն ժամանակ, երբ երկրում չեմ, ու փորձում եմ իրականությունից կտրվել: Գրեթե բոլոր օրերս սկսվում են երեխաներիս համար ուտելիք պատրաստելով, նրանց հետ շփվելով: Ինձ համար դա պարտադիր արարողակարգ է:

-Կենցաղում ի՞նչը տանել չեք կարողանում:


- Ատում եմ փոշիներ մաքրելը: Նյարդերս հանգստանում են, երբ արդուկում եմ, կամ ափսեներ եմ լվանում, բացի այդ 2 տնային գործերից մնացած ամեն ինչ հավասար է տանջանքի: Հիմնականում օգնականների միջոցով եմ այդ հարցերը լուծում, որովհետև նյարդերս իրոք չեն հերիքում, չեմ սիրում:

- Ի՞նչը կարող է Ձեզ հունից հանել:

-Անազնվությունը, անարդարությունը և ծայրաստիճան տգիտությունը: Այս երևույթների հետ կապված յուրաքանչյուր դրսևորում ինձ հունից կհանի:

-Երեկոյան Երևանում հատկապես որտե՞ղ Ձեզ կարելի է տեսնել:

-Ես ծնվել, ապրում ու հանդիպումներս հիմնականում կազմակերպում եմ Փոքր կենտրոնում: Ինձ շատ հոգեհարազատ է, ու հենց այդտեղ էլ ինձ կարելի է հաճախ տեսնել: Հաճախ եմ լինում նաև Հյուսիսային պողոտայում, Կասկադում, Մոսկվա կինոթատրոնի տարածքում և Աբովյան փողոցի վրա:

- Ձեր կյանքի ամենադժվար շրջանը:


- Իմ նախկին ամուսնու հետ ապրած տարիները:

- Հաջողության հասնելու համար ի՞նչն է առանցքային՝ աշխատասիրությո՞ւն, խե՞լք, թե ծանոթ:

- Ամենաառաջին տեղում նպատակը ձևակերպելն է, այնուհետև ունենալ դիսցիպլինա, աշխատասիրություն և ձգտում: Խելքն էլ է շատ կարևոր, առանց դրա հնարավոր չէ ճիշտ մարտավարություն կազմել, թե ինչպես կարելի է հասնել նպատակին: Ծանոթ ինձ երբեք պետք չի եղել, հստակ կարող եմ ասել, որ առանց դրա էլ հնարավոր է հասնել հաջողության:

- Ի՞նչ կփոխեիք Ձեր արտաքինի մեջ:

- Եթե մի քանի տարի առաջ հարցնեիք, գուցե շատ բաներ ասեի, որովհետև այդքան էլ հաշտ չէի իմ արտաքինի հետ, բայց հիմա ամեն ինչ հարթ է: Ինձ չեմ համարում գեղեցկուհի կամ իդեալ, բայց ես ինձ այսպիսին սիրում եմ:

- Ո՞ւմ կամ ինչի՞ն եք պարտական, որ պահանջված DJ եք:

- Միայն ինքս ինձ եմ պարտական, իմ աշխատասիրությանը, նաև իմ խիզախությանը, որ դժվար տարիներին, երբ աղջիկ DJ հասկացողությունը հավասարվում էր այլմոլորակայինի հետ, ես համարձակ եղա և գնացի իմ երազանքի հետևից:

- Ինչի՞ց եք ամաչում:

- Ամաչում եմ, երբ ինձ կոմպլիմենտ են անում: Բավական մեծ եմ, բայց դեռևս չեմ սովորել հաճոյախոսությունն ադեկվատ ընդունել:

- Ինչի՞ մասին եք երազում:

- Հայաստանում ապրելով չեմ կարող չնշել, որ իմ առաջին երազանքը, բնականաբար, արժանապատիվ կերպով ապրելն է հայրենիքում: Երազում եմ արժանապատիվ խաղաղության մասին: Ինչ վերաբերում է անձնական երազանքներին՝ ինքս ինձ հետ խաղաղության, ներդաշնակության: Քիչ վազեմ տարբեր նպատակների հետևից և ավելի կենտրոնանամ իմ ներքին աշխարհի վրա, գիրք կարդամ, ազատ ժամանակ մի քիչ ավելի շատ ունենամ: