Լրահոս

Անհետ կորած զինվորների ծնողները փոխանցել են՝ իրենց որդիները գերեվարված են Իրանում. Նաիրա Զոհրաբյանը դիմում է Իրանի դեսպանին




Ազգային ժողովի պատգամավոր Նաիրա Զոհրաբյանն ահազանգում է՝ տևական ժամանակ է անհետ կորած զինծառայողների բազմաթիվ ծնողներ իրեն տեղեկատվություն են փոխանցում, որ ունեն հավաստի տեղեկություններ, անգամ հեռախոսազանգեր, որ իրենց որդիները պատերազմի օրերին՝ Արցախի հարավային մասից՝ Ջաբրայիլի հատվածից, հատել են Իրանի հետ պետական սահմանն ու գերեվարված են Իրանում։

«Ավելին, ծնողներից մեկը հստակ նշեց Իրանի բնակավայրը՝ Ամանդի գյուղի զորամաս, ուր, ըստ իրենց հասած տեղեկության, պահվում են հայ զինվորները, որոնք համարվում են սահմանահատներ։ Տևական ժամանակ է ես զբաղվում եմ այս խնդրով և այս հարցը քանի անգամ քննարկել եմ Իրանում Հայաստանի դեսպան Արտաշես Թումանյանի հետ, ով վստահեցրել է, որ նման բան չկա։ Ավելին, մի քանի ծնողներ անգամ Թավրիզ են հասել ու հանդիպել հայ սրբազանի հետ և կրկին պատասխանը եղել է, որ նման բան չկա», - ֆեյսբուքյան իր էջում գրել է պատգամավորը։

Նա տեղեկացրել է, որ պաշտոնապես դիմել է Իրանի արտաքին գործերի նախարարին և իրեն պատասխանել են, որ նամակը ստացված է ու որոշ ժամանակ անց կպատասխանեն։

«Դեռ պատասխան չկա։ Ռուսաստանի իմ գործընկերների միջոցով կապ ենք հաստատել իրանցի մի քանի գեներալի հետ, ովքեր ևս ո'չ հերքել, ո'չ հաստատել են տեղեկությունն ու ժամանակ են խնդրել հստակ պատասխան տալու համար։ Այս պահին դեռ չէի բարձրաձայնի այս խնդիրը և կշարունակեի լուռ զբաղվել ծնողների հետ, եթե մամուլն արդեն այս հարցը չհրապարակայնացներ։

Բնականաբար, ցնցող էր Հայաստանի պաշտպանության նախարարության պատասխանը՝ որ իրենք այս թեմայով մեկնաբանություն չունեն։

Բա ո՞ր թեմայով ունեք։ Թե՞ դուք ընդհանրապես ոչ մի թեմայով ոչ մի մեկնաբանություն չունեք և ընդհանրապես՝ ոչ մի թեմայի մեջ չկաք։

Հարյուրավոր ծնողներ ամեն օր ապրում են գոնե մի լուր ստանալու հույսով, իսկ սրանք, պարզվում է, մեկնաբանություն չունեն։
Հիմա պաշտոնապես դիմում եմ Հայաստանում Իրանի դեսպանին, քանի Հայաստանի պաշտպանության նախարարը անհասկանալի բիոզանգված է՝ ընդունել այն մայրերին, ովքեր որոշակի տեղեկատվություն կարող են փոխանցել Իրանում իրենց որդիների հնարավոր գտնվելու վերաբերյալ, լսել մայրերին ու փորձել ամիսներ ձգվող այս մղձավանջը հանգուցալուծել», - նշել է Զոհրաբյանը։

Տեղեկացնենք, որ EXCLUSIVElife.am-ը այս օրերին աշխատում է հատուկ ռեժիմով։ Մենք ներկայացնում ենք Հայաստանի և Արցախի «սահմանների ճշգրտման» կարևորագույն լուրերը միաժամանակ ներկայացնելով նորությունները հայկական շոու բիզնեսից։