Տոկիո-2020. Կորյուն Սողոմոնյանը լքեց պայքարը
1/16 եզրափակիչում հայ բռնցքամարտիկը ժամանակից շուտ պարտվեց Մեծ Բրիտանիան ներկայացնող 28-ամյա Ջալալ Յաֆային:
Բոլոր՝ 3 ռաունդներում ռինգի մրցավարը մեկական անգամ հաշիվ բացեց Կորյուն Սողոմոնյանի բաց թողած հարվածներից հետո: Երրորդ ռաունդում մրցավարը դադարեցրեց մենամարտը հայ բռնցքամարտիկի բաց թողած հարվածից հետո:
1/8 եզրափակիչում Յաֆայի մրցակիցը հուլիսի 31-ին կլինի զամբիացի Պատրիկ Չինյեմբան:
Կորյուն Սողոմոնյանը և Ջալալ Յաֆայը հանդիպել էին նաև Փարիզում տեղի ունեցած օլիմպիական վարկանիշային մրցաշարում, որտեղ դարձյալ հաղթել էր բրիտանացի բռնցքամարտիկը:
Տոկիո-2020-ի բռնցքամարտի մրցաշարում Հայաստանի առաջին ներկայացուցիչ, 2018թ. Եվրոպայի չեմպիոն, Մինսկ-2019-ի Եվրոպական խաղերի հաղթող, 2018 եւ 2019 թվականների աշխարհի առաջնության բրոնզե մեդալակիր Հովհաննես Բաչկովը (63 կգ) հուլիսի 25-ին մեկնարկային գոտեմարտում վստահ հաղթանակ էր տարել Անտիգուան ներկայացնող Ալսթոն Ռայանի նկատմամբ և դուրս եկել 1/8 եզրափակիչ, որտեղ հուլիսի 31-ին կմրցի ադրբեջանցի Ջավիդ Չելեբիեւի հետ:
Արման Դարչինյանը (75 կգ) հուլիսի 29-ին պայքարը կսկսի 1/8 եզրափակիչից, որտեղ ուժերը կչափի սլովակ Անդրեյ Շեմեզի և Տրինիդադ Տոբակոն ներկայացնող Պրինց Արոն Սոլոմոյի միջև մենամարտի հաղթողի հետ։
Կորյուն Սողոմոնյան, բռնցքամարտ, 52 կգ քաշային կարգ
Ծնվել է 1993 թվականի մայիսի 16-ին Կոտայքի մարզի Զովունի գյուղում:
Անձնական մարզիչը հայրն է՝ Սամվել Սողոմոնյանը:
Ամուսնացած է, ունի երկու երեխա:
Կորյուն Սողոմոնյանը բռնցքամարտով զբաղվում է 8 տարեկանից: Հայաստանի բազմակի չեմպիոն է, 2009 թվականին Երեւանում անցկացված պատանիների աշխարհի առաջնությունում դարձել է չեմպիոն, 2010 թվականին Բաքվում մասնակցել է պատանիների աշխարհի առաջնությանը, բայց չի հաջողվել պահպանել չեմպիոնի տիտղոսը:
2011 թվականի պատանիների Եվրոպայի չեմպիոն է, 2012 թվականի Եվրոպայի մինչեւ 22 տարեկանների չեմպիոն: 2015 թվականի մեծահասկաների Եվրոպայի առաջնությունում զբաղեցրել է 5-րդ տեղը:
2017-ից թվականից երկու տարի Կորյուն Սողոմոնյանի մարզական կարիերայում դադար է եղել: Վերադարձել է 2019 թվականին եւ նույն տարում դարձել ՀԱՕԿ-ի նախաձեռնությամբ Երեւանում դեկտեմբերի 13-18-ը անցկացված «Կաշվե ձեռնոց» բռնցքամարտի ընտրական մրցաշարի հաղթող:
Տոկիո-2020-ի օլիմպիական ուղեգիրը նվաճել է 2020 թվականի մարտի 16-ին Լոնդոնում մեկնարկած ու կորոնավիրուսի համավարակի պատճառով դադարեցված օլիմպիական վարկանիշային մրցաշարում:
