Արևիկ Գևորգյանը՝ «Սողոմոնի երգերը» ֆիլմում իր դերի և նկարահանման հետաքրքրիր դրվագների մասին

Սեպտեմբերի 10-ին Հայաստանում մեծ էկրաններին կբարձրանա Արման Նշանյանի «Սողոմոնի երգերը» ֆիլմը։ Սցենարի հեղինակը Օդրի Գևորգյանն է։ ֆիլմի հիմքում Սիրվարդ Կավուկչյանի գրած պատմությունն է։

Ժապավենը ներկայացնում է Կոմիտասի կյանքի պատմությունը, որը, ըստ պարբերականի, խորն ազդեցություն է ունեցել էթնոերաժշտության վրա։ Ժապավենն ընդգրկում է 1881-1915թթ. ընկած ժամանակահատվածը, որն առնչվում է ինչպես Հայոց ցեղասպանությանն, այնպես էլ Կոմիտասի վերջին համերգին։
Ֆիլմում խաղացել են Սամվել Թադևոսյանը, Արևիկ Գևորգյանը, Տաթև Հովակիմյանը, Սոս Ջանիբեկյանը, Արման Նշանյանը, Արտաշես Ալեքսանյանը և Ժան Նշանյանը, ինչպես նաև փոքրիկ դերասաններ Սլավա Սեյրանյանը, Իռեն Այվազյանը և Մերի Հովսեփյանը։

BlogNews.am կայքի հետ զրույցում դերասանուհի Արևիկ Գևորգյանը պատմում է, թե ինչպես ստացավ ֆիլմում նկարահանվելու առաջարկը, ինչպես են անցել նկարահանումները և դժվա՞ր էր արդյոք իր համար ֆիլմում մարմնավորել թուրք կնոջ։

-Ինչպե՞ս ստացար առաջարկը: Գիտեմ, որ բոլոր դերասանները մասնակցել են քասթինգին: Քասթինգ ասվածը փորձությո՞ւն էր քեզ համար:
-Ստացա առաջարկը Արման Նշանյանից, մասնակցեցի վիդեո պրոբային, փորձություն չէ ինձ համար, շատ առողջ եմ վերաբերվում այդ փուլին:

-Հայ դերասանները, առհասարակ, դժվարությամբ են հաղթահարում թուրքի կերպար մարմնավորելու անջրպետը, թեպետ, հանուն արդարության, քո մարմնավորած Սևիլը բարի է, ընկերասեր և այլ վեհ հատկանիշներով էր օժտված: Բախվե՞լ ես դժվարությունների։
-Մարմնավորել եմ Սևիլին, ապրել եմ Սևիլով, եղել եմ Սևիլ, ես չեմ հենվել ազգության վրա, որովհետև կան իրավիճակներ որտեղ կարևորը մարդն է, ոչ թե իր ազգությունը, ես չեմ փորձել Սևիլին ներկայացնել որպես թուրք հերոսուհի, ով վտանգում է իր կյանքը հանուն հայի, այլ իմ համար կարևոր էր Սևիլին ներկայացնել որպես մարդու ով ունակ է սեփական կյանքը վտանգել իր ընկերոջը փրկելու համար, և այստեղ կարծես ազգությունը լռում է, համենայնդեպս, իմ համար։
Իհարկե, չեմ ուզում անհարկի պրոպագանդել մեր թշնամիներին, բայց հանուն արդարության պիտի նշեմ, որ թե՛ այն տարիներին, թե՛ հիմա կան եզակի մարդիկ, ովքեր դեմ են իրենց ազգի ոճրագործ գաղափարախոսությանը:



-Ինչպե՞ս ես նախապատրաստվել դերին, ի վերջո, երբեք պատմական դրամայում չէիր խաղացել, ինչպես նաև թրքուհու չէիր մարմնավորել:
-Երբ գիտակից տարիքում բախվում ես մեր պատմությանը, ապրումներդ և ընկալումներդ դեմ են առնում անասելի անարդարության, ու ելք ես փնտրում ամեն գնով:
Միշտ համոզված եմ եղել, որ ամեն մարդ իր տեղում, իր աշխատանքով՝ լուռ աշխատանքով, մասնագետ դառնալով կարող է լումա ունենալ իր երկրի զարգացման գործում: Ստանալով Արմանից առաջարկը ծանոթացա սցենարին, Սիլվարդ Կավուկչյանի պատմությանը, և հասկացա, որ սա գուցե եզակի հնարավորություն է իմ մասնագիտությամբ և շնորհիվ լսելի դարձնել մեր պատմությունը ամբողջ աշխարհին:

Առավել մանրամասն՝ սկզբնաղբյուր կայքում