Արոնյա՞ն, թե՞ Նակամուրա. ՖԻԴԵ-ի «Գրան պրիի» մրցաշարի հաղթողը կճանաչվի թայ–բրեյքով
Պարտիան, որում Արոնյանը սպիտակներով էր խաղում, 30-րդ քայլի վրա ավարտվեց ոչ–ոքի։ Առաջին պարտիայում մրցակիցները ևս կիսեցին միավորները։ Խաղի հիմնական ժամանակն ավարտվեց 1:1 հաշվով։ Վաղը` փետրվարի 17-ին, շախմատիստները թայ–բրեյք կխաղան` որոշելու համար սերիայի առաջին մրցաշարի հաղթողին։
Բեռլինում անցկացվող մրցաշարի 16 մասնակիցները բաժանվել են 4 խմբի։ Արոնյանը С խմբում է, որտեղ նրա մրցակիցներն էին գերմանացի Վինսենտ Կեյմերը, հնդիկ Սանտոշ Վիդիտը և ռուսաստանցի Դանիիլ Դուբովը։ Արոնյանը վաղաժամ զբաղեցրեց խմբում առաջին տեղը և կիսաեզրափակիչ դուրս եկավ, որտեղ հաղթանակ տարավ ամերիկացի գրոսմայստեր Լենյեր Դոմինգեսի նկատմամբ (1,5:0,5)։ Խմբային փուլում շախմատիստները 6 տուր խաղացին։
Հիշեցնենք, որ սա «Գրան պրիի» սերիայի երեք մրցաշարերից առաջինն է։ Սերիայի երկու հաղթողները կմասնակցեն հավակնորդների մրցաշարին։