Լրահոս

Մարատ Հայրապետյանը՝ նոր մասնագիտության, պատվոգրերի եւ ընտանիքի մասին




Bravo.am-ը գրում է.

Նույն ինքը երգիչ-երաժիշտ, նույն ինքը նախարարի խորհրդական, նույն ինքը բժիշկ-բնաբան։ Այո՛, այս բոլոր թվարկումները Մարատ Հայրապետյանի, այժմ արդեն՝ Մարկ Մարատ Հայի մասին են։ Հայոց երկրի հայ շինարարին փառաբանող, դասական կեցվածքով երիտասարդից, սակայն, գրեթե ոչինչ այլեւս չի մնացել։ Նա փոխել է բնակության վայրը, արտաքինը, մասնագիտությունն ու մասամբ նաեւ անունը։

- Ոչ միայն շոու բիզնեսում, այլ առհասարակ կյանքում այդքան էլ հաճախ չի պատահում, որ մարդը մասնագիտական եւ ոճային այդպիսի կտրուկ փոփոխություններ անի, ինչպես Դուք։ Ո՞րն էր կերպարանափոխության պատճառը։

- Մասնագիտական փոփոխության հետ համակարծիք չեմ, որովհետեւ ես միշտ ասել եմ, որ, երբ 6 տարեկան էի, ունեի երկու երազանք՝ ուզում էի դառնալ երաժիշտ եւ բժիշկ։ Մի տարբերությամբ միայն, որ 6 տարեկանում ավելի շատ մտածում էի վիրաբուժության մասին։ Ինչո՞ւ չդարձա վիրաբույժ, այլ ընտրեցի բնաբան-բնաբույժի մասնագիտությունը։ Որովհետեւ ժամանակի ընթացքում հասկացա, որ ուզում եմ դառնալ մեկը, որն իր գործունեությամբ կարող է կանխել մարդկանց հայտնվելը վիրաբուժական սեղանին։ Խոր ակնկածանք ունենալով վիրաբույժների հանդեպ եւ իմ ընտանիքում ունենալով վիրաբույժներ՝ ես գիտակցեցի, որ ամեն ինչ պետք է անել, որպեսզի մարդը չհայտնվի վիրաբուժական սեղանին։ Մասնագիտության ընտրությունը պայմանավորված էր նաեւ իմ անձնական խնդիրներով։ Նախ գիրացել էի եւ որեւէ կերպ չէի կարողանում վերադառնալ ցանկալի կազմվածքին։ Բացի այդ, ունեի լյարդի ճարպակալում, նյարդային համակարգի խնդիրներ, անքնություն։ Եվ, դժբախտաբար, դրանք կոնսերվատիվ միջոցներով չէին բուժվում, չնայած բազմաթիվ փորձեր արել էի։ Խնդիրները չէին կարգավորվում մինչեւ այն պահը, երբ սկսեցի խորությամբ ուսումնասիրել դիետոլոգիան, բնաբուժությունը եւ ամբողջությամբ փոխեցի սննդակարգս, ընտրեցի բուսական բնաբուժական մեթոդներ։ Իմ բոլոր խնդիրները մոտ 8 ամսվա ընթացքում սկսեցին կարգավորվել։



- Քանի՞ տարի եք արդեն զբաղվում բժշկությամբ։

- Խորապես զբաղվում եմ 2012 թվականից, 2020 թվականին ավարտել եմ համալսարանը, իսկ այս տարի էլ դոկտորականը պաշտպանեցի։ Իսկ իմ առողջության կենտրոնը կա 2017 թվականից, մինչ այդ էլ աշխատում էի այլ կենտրոններում։

- Ի վերջո, հիմա ավելի շատ բժիշկ Մարատ Հայրապետյան, թե՞ երաժիշտ Մարատ Հայրապետյան։

- Կարծում եմ, սկզբում եղել է երաժիշտ, հետո բժիշկ եւ երաժիշտ, հիմա, կարծում եմ, ավելի շատ բժիշկ փուլում եմ։ Շատ մարդիկ ինձ փողոցում, երբ տեսնում են, ասում են՝ ինչո՞ւ չեք երգում, բայց ես պատասխանում եմ, որ համակարծիք չեմ, որովհետեւ երգում եմ, եթե կա համապատասխան գեղեցիկ միջոցառում կամ առիթ, պարզապես ամբողջ թափով չեմ զբաղվում երաժշտությամբ։



Նյութը՝ Bravo.am