«Գալիս եմ «Եվրատեսիլ»՝ ստեղծելու իմ արվեստը»․ ո՞վ է Բրյունետը եւ ինչպե՞ս նրա անունը տարածվեց համացանցի հայկական տիրույթում

«Գալիս եմ «Եվրատեսիլ»՝ ստեղծելու արվեստ․․․ իմ արվեստը»,-ասում է Բրյունետը՝ երգչուհին, որը Հայաստանը ներկայացնելու է «Եվրատեսիլ 2023»-ին։ Այն, որ մրցույթում Հայաստանի այս տարվա պատվիրակը Բրյունետն է, խոսվում էր շատ վաղուց, սակայն Հայաստանի Հանրային հեռուստաընկերությունը միայն երեկ պաշտոնապես հաստատեց լուրը։

«Հայաստանն այս տարի «Եվրատեսիլում» կներկայացնի երգչուհի Բրյունետը: Որոշումը կայացվել է Հանրային հեռուստաընկերության անցկացրած ներքին ընտրության արդյունքում»,-տեղեկացնում է Առաջին ալիքը։

Ո՞վ է Բրյունետը, եւ ինչպե՞ս նրա անունը տարածվեց համացանցի հայկական տիրույթում։

 

 Երգչուհին շատ հարցազրույցներ չի տվել։ Հայտնի է, որ նրա անունը Էլեն Երեմյան է։ Երգել սկսել է 4 տարեկանից, իսկ ստեղծագործում է 15-ից: Իր բոլոր երգերի երաժշտության եւ բառերի հեղինակը հենց ինքն է: Երգչուհին Project 12 խմբի անդամ է։

Բրյունետը միանգամից ճանաչման հասավ «Բաց կապույտ աչքերդ» հիթի թողարկումից հետո, որն անմիջապես մեծ տարածում գտավ համացանցում, մասնավորապես՝ TikTok-ում։ YouTube-ում երգը գրանցել է 5 միլիոն դիտում։ Բրյունետի ալիքն ունի ավելի քան 55 հազար հետեւորդ, իսկ ինստագրամյան էջում երիտասարդ երգչուհուն հետեւում է 271 հազար օգտատեր։ Բրյունետի «Գիշեր», «Smoke Break» երգերը եւս կարճ ժամանակում հիթ են դարձել։ Առաջինը YouTube-ում ունի 742 հազար, իսկ երկրորդը՝ ավելի քան 3 միլիոն դիտում:

Թե ինչ երգով է երգչուհին ներկայանալու «Եվրատեսիլ»-ին, պարզ կդառնա առաջիկայում։

Այս տարվա «Եվրատեսիլը» կհյուրընկալվի Լիվերպուլում։ Մրցույթը տեղի կունենա մայիսի 9-ին, 11-ին եւ 13-ին։ Բրյունետը Հայաստանը ներկայացնելու է մրցույթի երկրորդ կիսաեզրափակչին՝ մայիսի 11-ին՝ ելույթ ունենալով 1-ին համարի ներքո։