Երազանքների զգեստ․ ի՞նչ հարսանեկան հանդերձանք են նախընտրել հայ հայտնիները

Հարսանեկան ճերմակ զգեստ կրելը, գրեթե, ցանկացած աղջկա երազանքն է։ Ժամանակների հետ հարսանեկան զգեստները փոփոխվել են՝ փքված շրջազգեստներից մինչեւ իրանն ընդգրկող կիպ ուրվագծեր, իսկ ավելի համարձկներն ավանդական սպիտակ երանգը փոխարինում են սեւով, կարմիրով, կամ, նույնիսկ, վարդագույնով։

Ժամանակները փոխվում են, թրենդները՝ եւս, բայց յուրաքանչյուրն, իհարկե, ունի իր պատկերացումների զգեստը, որով էլ իրեն տեսնում է իր կյանքի կարեւորագույն խնջույքին։

Ի՞նչ հարսանեկան զգեստներ են նախընտրել հայտնի հայ հարսանացուները։ NEWS.am STYLE-ը վերհիշել է նրանցից մի քանիսի հարսանեկան look-երը։

Դերասանուհի Քրիստինա Եղոյանի հարսանիքը տեղի է ունեցել 2021-ին։ «Ֆուլ Հաուս»-ի աստղն այդ օրվա համար նախընտրել էր փարթամ շրջազգեստով ու երկար քողով շքեղ զգեստ։ Զգեստի քողը, պարանոցն ու շրջազգեստը պատված են նուրբ ժանյակներով։



Երգչուհի Մարի Ավանեսյանի հարսանիքը եւս 2021-ին էր։ Մարին օրվա համար յուրահատուկ զգեստ էր ընտրել։ Զգեստի շնորհիվ հարսնացուն ընդգծել է պարանոցն ու ուսերը։ Թեւքերը լայն են, զգեստն ունի գեղեցիկ կորսետ եւ պատված է մանր փայլերով։ Մարիի մազերը կիպ հավաքված են, իսկ գլուխը զարդարում են թագն ու քողը։



ՏիկՏոկեր Օվսին եւս նախապատվությունը տվել է մարմինն ընդգծող կորսետին, նրա ուսերը զարդարում են զգեստի հուլունքները։ Եթերային զգեստի հետ Օվսին նախընտրել է նաեւ եթերային սանրցածք՝ արձակած ալիքներով։



Բեն Ավետիսյանի կինը՝ դիմահարդար Դիանա Տոնոյանը, նախընտրել է ավանդական ոճի հարսանեկան զգեստ՝ փարթամ շրջազգեստով, ժանյակներով ու ավանդական քողով։ Դիանայի շքեղ կերպարն ընդգծել է քարերով զարդարված խոշոր թագը։



Կերպարային յուրահատուկ մոտեցում է ցուցաբերել Եվա Զոհրաբյանը։ Դերասանուհին, ի տարբերություն շատերի, ավանդական սպիտակը փոխարինել է նուրբ վարդագույնով։ Եվայի զգեստն ունի գեղեցիկ լանջաբացվածք եւ փոռերով զարդարված շրջազգեստ, որը բավական ներդաշնակ է դերասանուհու զուսպ եւ նուրբ կերպարի հետ։

Լուսանկարները՝ հայտնիների ինստագրամյան էջերից