Փաշինյանի ընտանիքը կառավարական առանձնատանը հյուրընկալել է պատերազմի ընթացքում մարտնչած ու վիրավորում ստացած մեր զինվորների հերթական խմբին. ԼՈՒՍԱՆԿԱՐՆԵՐ
ՀՀ վարչապետ Նիկոլ Փաշինյանը տիկնոջ՝ Աննա Հակոբյանի հետ հյուրընկալել է պատերազմի մասնակից զինվորների հերթական խմբին:
«Այսօր հյուրընկալել ենք պատերազմի ընթացքում տարբեր ռազմաճակատներում մարտնչած ու վիրավորում ստացած մեր զինվորների հերթական խմբին։
Նրանցից ոմանք ժամկետային զինծառայողներ էին, երբ պատերազմ սկսվեց։ Ոմանք էլ աշխարհազորայիններ ու կամավորներ՝ որոնք Ադրբեջանի սանձազերծած ռազմական գործողությունների սկսելուն պես մեկնեցին ռազմաճակատ։
Այս երիտասարդներից յուրաքանչյուրի պատմությունն իսկապես հերոսական է։ Նրանք անցել են բազմաթիվ դժվարությունների միջով, սակայն չեն կոտրվել։
Մեզ համար կարևոր էր նրանց հետ ծանոթանալը, նրանց պատմությունները լսելը, ապագայի ծրագրերի մասին իմանալը։
Պատերազմով անցած երիտասարդները անկաշկանդ մթնոլորտում կարողացան հարցեր ուղղել ՀՀ վարչապետին, ստանալ պատասխաններ։
Զրույցի ընթացքում նաև արձանագրեցինք մի շարք խնդիրներ, որոնց լուծմանը հետամուտ կլինենք։ Փոխանակվեցինք տվյալներով՝ հետագայում էլ կապ պահպանելու համար»,- տեղեկացրել է Աննա Հակոբյանը։
