Կարեն Խաչանով. «Ոչ ոք դեռ չի արգելել գրել տեսախցիկի վրա»
«Երկրորդ անգամ անընդմեջ «Մեծ սաղավարտի» մրցաշարի կիսաեզրափակիչ, հիանալի է: Խաղն ավարտվեց ոչ այնպես, ինչպես ես էի ցանկանում: Սեբաստիանը լուրջ մրցակցություն ցույց տվեց: Նա հիանալի թենիսիստ է և հաղթել էր իմ ընկեր Դանիիլ Մեդվեդևին ու Հուբերտ Հուրկաչին:
Ինձ շատ լավ եմ զգում: Կարծես վերագտել եմ ինձ: Միշտ էլ հավատացել եմ ուժերիս, սակայն, երբ լավ արդյունքի ես հասնում, այդ հավատը բազմապատկվում է: Անհամբերությամբ եմ սպասում եզրափակիչին»,- ասել է 26-ամյա թենիսիստը մրցախաղից հետո:
Հետխաղյա ասուլիսի ժամանակ Կարեն Խաչանովը պատասխանել է այն հարցին՝ ինչու գրություն չի թողել տեսախցիկին: Նախորդ երկու հաղթանակներից հետո նա աջակցություն էր հայտնել Արցախին, որը մեկ ամսից ավելի շրջափակված է Ադրբեջանի կողմից։
«Ինձ արգելելու կամ պատժելու պահանջների մասին ոչինչ չգիտեմ։ Ոչ ոք դեռ չի արգելել գրել տեսախցիկի վրա։ Բացմիցս նշել եմ, որ հայկական արմատներ ունեմ և ցանկացել եմ աջակցել իմ ժողովրդին այդ ուղերձներով։
Կնոջս ու որդուս հետ 2021-ին այցելել էինք Հայաստան, եղանք բազմաթիվ գեղեցիկ վայրերում ու վանքերում։ Ավելի լավ ճանաչեցի երկիրը։ Վերադարձից առաջ էլ վարպետության դաս անցկացրի 300-400 երեխաների համար։ Զարմացած էի, թե որքան մեծ էր ինձ տեսնելու նրանց ցանկությունը։ Շատ հաճելի պահ էր»,- ռուսաստանցու խոսքը մեջբերում է ATP-ի մամուլի ծառայությունը։
Հիշեցնենք, որ US Open-2022-ում Կարեն Խաչանովը նույնպես հասել էր կիսաեզրափակիչ, որտեղ 1-3 հաշվով պարտվել էր նորվեգացի Կասպեր Ռուդին:
Մելբուրնում ընթացող «Մեծ սաղավարտի» տարվա առաջին մրցաշարի կիսաեզրափակիչում հայ թենիսիստը կհանդիպի Ստեֆանոս Ցիցիպաս (Հունաստան) - Իրժե Լեգեչկա (Չեխիա) զույգի հաղթողին:
Australian Open-ի մրցանակային հիմնադրամը 51 միլիոն դոլար է: Գործող չեմպիոնն իսպանացի Ռաֆայել Նադալն է, որը սենսացիոն պարտություն էր կրել երկրորդ շրջանում։
